Meri ammi mujhe her waqt seeney se lagati thi

 Jagi rehti thi saari rat per mujh ko sulati thi

 

Zara sa mere ronein per woh yak dum jaag jaati thi

thapakti thi mujhe dheere se aur lori sunati thi

 

Kahani  aur khilonon se kabhi jab bhi oob jaata tha

Ruppata baandh ker dar per mujhe jhula jhulati thi

 

Koi chijji na milnein per  mein jab bhi rooth jata tha

Bitha ker god mein mujh ko dahi makhkhan khilati thi

 

Kabhi nadaani per meri jo abba dant-te mujh ko

 Chupa leti mujhe aanchal mein aur khud daant khati thi

 

Kabhi maatha garam ho ya mujjhe ek cheenk aajaye

 Nazar bad se bachanen ko sada mirchi jalati thi

 

Zara budhi hai ab ammi magar ab bhi use akser

 Woh angan yaad aata hai jahan mujh ko sulati thi

 

Bada ahsan ALAM per  ke tune aisi Ammi di

Jo khud mushkil me rehti thi magar mujhko hansati thi