Andhi tha tufaan tha

Zinda dil shakil tha

Jalwa benazir tha

Mehfilon ki shaan tha

Her gali mein naam tha

Mein bhi kabhi Jawan tha

 

Mein daurta tha her taraf

Pehchaanti thee her sadak

Khel kya khalyan kya

Shehar kya veeran kya

Sab thay mere zer-e-Paa

Mein daurta din raat tha

Mein bhi kabhi Jawan tha

 

Tabiyat mein thee awargi

Doston ki fauj thee

Panchi mein azaad tha

Pinjra thaa naa jaal that

Shehar ke deewanon mein

Mera awwal naam tha
Mein bhi kabhi Jawan tha

 

Jidhar bhi jaata tha nikal

Log jaate thay sambhal

Juli, Nabeela aur Saba

Ghere rehti theen sada

Sab hi ka mein khas tha

Sab ko mujh se pyar tha

Sab hi meri mureed theen

Mein ladkiyon ki jaan tha

Mein bhi kabhi Jawan tha

 

Phir yun huwa shaadi hui

Zindagi aadhi hui

Shayista ek gul-badan

Ban gai meri dulhan

Mehjabeen ka saath tha

Ek naya aaghaz tha

Raat din aathon pehar

Bas usee ka naam tha

Mein bhi kabhi Jawan tha

 

Zindagi aage badhi

Azmaish thee kadi

Bachche mere masoom se

Mujh se bade hone lagey

Dost aur ehbab sab

Mujh se juda honey lage

Kyun hai itni be-basi

Kya yehi hai zindagi

Mein akela baith ker

Sochta din raat tha

Mein bhi kabhi Jawan tha

 

Jab ke mein jawan tha

Josh tha ufaan tha

Per naa mujh ko tha sabar

Sach se tha mein be khabar

Ab ke jab boodha hua

Shakhs mein pura hua

Ab hai mujh ko sab khabr

Akhrat ki hai fikar

Pehle mein nadaan tha

Hasher ka naa dhyan tha

Mein bhi kabhi Jawan tha